1987.8.15玉郎漫画101期-陈百强专访
猛星专访，右起：
- 将来大个要似他，一柱擎天好威水！
- 百强三岁肥仔唛，已经好鬼有气质
- 着埋大褛更有型，Mark哥他都话我醒！
- 成只熊仔湿“立立”，皆因忍唔住尿急！
- 熊仔要一家团圆，唯有致电动物园！
- 边个抛弃光头仔，一于打到他黐肺！
- 出年我会搅个唱，各位记住要捧场！
- 三大小生齐聚首，交换心得沟女友！
- 劲歌热舞娱嘉宾，靓仔靓女冧巴ONE!
- 浪迹天涯孭背囊，四处遨游任我闯！
- 乜话？即刻要录歌？咁就要讲Bye Bye啰！……
下集大结局
编绘：祁文杰
陈百强：“HI，我哋又见面嘞！”
黄玉郎：“今期续访陈百强，上集临尾讲过今次要爆他嘅初恋情史，大家留意嘞！……”
黄玉郎：“Danny仔，你一向都是斯文靓仔成个大情人咁款，读书个阵梗是氹到D女同学冧晒啦！”
陈百强：“TONY兄你讲错嘞，求学期间，小弟从来都冇主动去识女仔，反而被D女同学暗恋番转头，记得有次空堂，我喺学校礼堂弹琴，有个女同学企喺门口向我凝望，后尾重特登作咗一篇《飘忽》嘅散文嚟形容我添，好可惜我哋情若无花不结果……”
陈百强：“念起个阵都几惨㗎，由于小弟深受女同学们嘅欢迎，以致好多男同学大为不满，成日夹埋嚟排斥我添，搅到我非常孤独寂寞，连一个稍为倾得埋嘅难同学都冇，所以小息同空堂时间我都是一个人走去礼堂度弹琴消磨时间，直至中三嘅年，先至打破闷局，冰释前嫌，同D同学仔（FRIEND？）番咋，阴功！”
黄玉郎：“拍拖呢味嘢是少男少女必经嘅阶段，阁下嘅爱情故事又是如何呢？”
陈百强：“真是可惜，小弟由出世至今都未真真正正尝试过爱情嘅滋味，因为能够令自己倾心嘅女仔重未出现，所以可以讲得上是一个情场上嘅失败者！”
黄玉郎：“唔是吖嘛！你D情歌唱到鬼死咁投入，听到我如痴如醉，有乜理由你未尝试过爱情嘅滋味㗎？”
陈百强：“其实我唱D情歌之所以唱得咁投入，完全是自己幻想出嚟，全部都唔是自己亲身经历嚟㗎！”
黄玉郎：“估唔倒出晒名情圣嘅DANNY，原来是爱情方面咁鬼失败，你嘅择偶条件梗是好苛刻嘞，是咪呢？……不如清楚列明你嘅择偶条件畀各位女读者知，睇吓他哋有冇机会都好吖！……”
陈百强：“好简单啫，最紧要身材好，腿部修长，有涵养，斯文得体，（？）嘅外形咁就OK㗎嘞！…都唔知点解咁难揾嘅……冇办法啦，我好相信眼缘嘅，而且自己又是唯美主义者，要求相当高，所以咪迟迟都未搵到理想对像啰！你话惆唔惆怅，有乜办法解救嘞！……”
黄玉郎：“哗！咁多要求，唔知有几多女读者合乎标准呢？是嘞，DANNY仔你已经到咗适婚年龄，有冇考虑过结婚呢件终身大事呀？”
陈百强：“结婚？讲笑咩，是未来呢几年我都会尽量搏杀，以事业为重，创作同埋唱多D好歌比大家欣赏，至于结婚就要等到三十五岁后先至考虑，事关睇相佬话我三十五岁后结婚先至能够白头到老，呢D嘢都是宁可信其有嘞！”
黄玉郎：“DANNY仔，有好多人都赞你有TASTE，衣着品味一直带领潮流，究竟你点睇呢？”
陈百强：“其实我唔是花好多钱在买衫方面，只是自己钟意研究外国时装，加上识得配搭，事业咪好似有好多新装咁啰，其实来来去去都是个几件㗎咋！”
黄玉郎：“听讲你好钟意去某大酒店度啖咖啡，有冇咁嘅事呢？”
陈百强：“冇错，好多时我都会去个度啖下午茶㗎，最主要都是贪舒服，自由自在，容易消磨时间。”
黄玉郎：“平时除咗钟意研究外国时装之外，得闲无事个阵阁下有D乜嘢特别嘅嗜好同娱乐咁呢？”
陈百强：“TONY兄，你都知我由细到大都好静㗎啦，所以得闲个阵最多都是去中环行街，游吓水同做健身运动，除此之外都冇乜特别嘅娱乐嘞！”
黄玉郎：“既然你除咗唱歌、登台、同开演唱会之外，重有咁多空余时间，点解唔拍吓电视剧咁呢？”
陈百强：“事关我最憎就是呢个字……赶。因为自从拍过电视剧《突破》后，发觉艺员生活相当紧张，日夜颠倒拍戏，都是唱歌比较舒服，唔驶咁赶吖嘛！”
黄玉郎：“拍电视剧就话嫌辛苦啫，咁电影应该比较舒服D啦，点解又好少见你出现大银幕呢？”
陈百强：“一日都是自己个样太过（？），所以角色局限于扮演斯文靓仔个类，好难有发挥机会，而且适合我嘅剧本亦好难揾。”
黄玉郎：“都未必嘅，最近你有份演出个部：《秋天的童话》，咪又是扮演靓仔，而且重受到一致好评添！”
陈百强：“是就是，我都好钟意呢部戏，可惜我是情商客串，冇钱收兼戏份少，无讲你哋都唔知㗎，阴公！……”
黄玉郎：“家阵有唔少艺人都身兼数职，譬如话投资做生意、从事写作、搅制作公司、甚至乎买马做马主，你有冇谂过照样去拓展你自己嘅事业呢？”
陈百强：“暂时唔会，因为我始终是歌星出身，事业会主力是唱歌同灌唱片方面，不过如果遇到有剧本适合我而且时间许可的话，我都会考虑吓拍电影，至于生意，已在积极进行中。”
黄玉郎：“咁就预祝你嘅歌唱事业同电影事业一样咁顺利，为拥护你嘅歌迷带来嚟更多嘅惊喜！”
陈百强：“多谢先，不过我重希望自己能够打破斯文仔形象，寻求新突破，务求令各位耳目一新！”
黄玉郎：“讲咗咁耐，我谂好多读者都想知道你是未来有D乜嘢大计，例如几时将再开演唱会嘅？”
陈百强：“未来大计梗是希望个唱歌方面得到大嘅成就，成为国际歌坛上嘅一位超级巨星啦，另外希望自己变得随和D，多D同圈中人交往、接触，更希望九月份喺澳门举行嘅个人演唱会，能够顺利演出，务求讲事业提示到另一个高峰，各位亲爱嘅拥趸，记住支持我呀！”
黄玉郎：“据我所知，DANNY仔你最近有意投资开一间高级时装店，实行过吓老板瘾咁话喎！”
陈百强：“是就是，不过暂时重未揾到合适嘅铺位，有待揾铺位后，就会即刻开张！到时TONY兄记住嚟捧吓小弟场，买番十零廿万银靓衫呀！……”
黄玉郎：“乜问题，到时一定捧场，不过唔知有冇折头、有冇赠品、买一送二、年结付款咁呢？”
陈百强：“只要玉郎兄畀面，点话点好啦，正所谓顾客至上吖嘛！”
黄玉郎：“多谢先，咁就预祝你间时装店大展鸿图，一本万利！今期专访有完嘞，一齐同读者讲声拜拜哩！……”
陈百强：”最后一提，我嘅新唱片《梦里人》已经推出喇，好歌赠知音，咪错过呀！”
相关文章：1987.8.8玉郎漫画100期陈百强专访
文字录入：雪雁鸿泥
公众号推文：
1987期刊｜玉郎漫画101期 陳百強专访（一）
1987期刊｜玉郎漫画101期陳百強专访（二）
1987期刊｜玉郎漫画101期陳百強专访（三）