与偶像一起心情乍惊乍喜
陈百强为林青霞破例登台
DANNY仔是个脾气怪怪的人，亦是一个完美的主义者，记得在无线十大劲歌金曲季选的当晚，他唱完得奖歌曲「等」之后，在录映厂门外，极之不满意的与我说：
「衰到死，咁快出嚟，唔俾我继续哼埋嗰几个音，人地成首歌最有味道，就係临尾哼哩几句，阻住晒，我无理佢㗎，我照哼，哼到完为止。」
可想而知，DANNY仔（陈百强）是个何等讲求完美的人。
其实，DANNY已经有好一段日子绝迹于幕前的表演，在他的演唱会之后，他去外地旅行也有一段日子，所以当晚他也有点儿紧张，在录影厂门外，他问我：
「点样呀，我今晚哩套衫衬成点呀？」
我真心称赞他说：
「好靓，全部都係最时兴嘅配搭，不过最抢镜重係你个心口针。」
「係呀，我自己都好中意。」
我一向都同意DANNY的讲法，男孩子也一样可以贪靓。
「最近时装店嘅生意好嘛？」
「好，啲朋友好俾面，生意几好，不过我都无乜钱赚嘅。」
「讲大话，生意好点会无钱赚喎！」
「唔信，我俾本存折你睇丫！人人都以为我屋企大把，其实我每个仙都係自己赚番嚟㗎，我根本就无钱。你都知我唔中意登台赚钱㗎啦。
唱歌係我嘅兴趣，我中意佢并唔係因为我要利用它成为我搵钱的工具。」
「那你六月又去美国大西洋城登台？」
他向我解释说：
「人家好有诚意，同我倾咗好耐，大大话倾咗成两年，今次我唔去，似乎係好唔俾面人地咁。」
今次，是DANNY第一次往大西洋城演唱，所以他心情极之兴奋，他说事前一定会落足时间做好准备功夫。
而这个演唱会，他更邀请到林青霞作特别嘉宾。
「我好开心，因为林青霞一直係我好崇拜的偶像，能够同佢合作，我心中简直有讲唔出的兴奋。」他肉紧的说。
目前，DANNY除了为六月往大西洋登台作准备外，他还积极地替华纳灌录他临别的最后一张个人大碟。
「你真係要离开华纳？」
他点点头：
「合久必分，好正常嘅事嚟啫。当然喺华纳我唔係百分之一百开心，但係公司对我都好好，佢俾我很高的价钱。
但係钱唔係我所渴望得到嘅嘢嚟，正如一张唱片佢地俾我分个三，你话同一蚊有乜嘢分别。
哩三毫子你认为对我有影响咩，我根本就唔在乎，最重係，我自己认为值得。」
「公司不能替你建立一个固定形象，而且你同CRYSTAL GAL嗰首歌，公司又无替你大力催谷过，会唔会係你离开华纳的原因之一。」
他坦白地说：
「我可以好肯定讲一句，哩两件事的确喺其中两个小小的原因，但他们并不代表全部。」
「咁你打算效力边一间唱片公司呢？外间一直话你去华星嘅成数最高。」我说。
「我重未知道自己会去边一间，因为现时有几间唱片公司都同我倾。
我想我会需要一段颇长嘅时间来考虑，然后作出选择，我希望拣一间真正适合自己的唱片公司。
到时我决定咗之后，我一定会第一时间告诉你！」
一个有理想的人，自然会不断前进，但愿DANNY今次能够作出一个正确的选择来！
芷灵
資料提供：Kark
文字录入：小鬼